Plantun de Prouvènço

Pèr coumpara dos planto d'encò nostre

Vulpia membranacea & Zygodon rupestris

Vulpia membranacea

Poaceae Graminaceae

Noms en français : Vulpie à longues arêtes, Vulpie membraneuse.

Descripcioun :
Aquesto co-de-reinard trachis dins li sablo en ribo de mar o de l'en dedins. L'enflourejado de 3 à 8 cm sort bèn de la guèno au contro de Vulpia fasciculata. La glumo d'en bas èi di proun pichouneto (fotò), de 0,2 à 3 mm au contro de la d'en aut. La palea fai 4,5 à 7 mm e l'ouvàri a ges de péu. Poudèn apoundre tambèn que la palea èi peludo sus soun esquino. Coumpara emé la co-de-reinard-à-uno-glumo que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Vulpia
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 3 à 8 cm
Flourido : Printèms - Estiéu

Sòu : Si
Autour basso e auto : 0 à 400 m
Aparado : Noun
Mai à jun

Liò : Sablo - Terraire safrous - Pelouso sablouso - Mar
Estànci : Termoumediterran à Mesoumediterran
Couroulougi : Mediterrano-Atlantico
Ref. sc. : Vulpia membranacea (L.) Dumort., 1824

Flouquet-dis-aubre

Zygodon rupestris

Orthotrichaceae

Nom en français : Houppe des rochers.

Descripcioun :
Aquelo mousso coumuno acroucarpo d'aperaqui 1 cm d'aut, se vèi bèn sus li pège d'aubre (pin, éuse, roure...). Li tijo soun dreissado en "C" e s'envertouion un cop seco. I'a un mouloun de rizouïde brun e papilous à la baso. Li fueio de 1,5 mm de long soun en formo de lanço emé uno costo que s'acabo en pouncho. Fai raramen d'espouroufite, pamens i'a proun de proupagulo (fotò) sus li bord di fueio.

Usanço :
Lou flouquet-dis-aubre èi lou mai coumun di Zygodon au nostre. Zygodon viridissimus s'atrovo dins li fourèst mai fredo dóu Neckeretea complanatae ; si fueio soun mai torso e si proupagulo diferènto.